Бирлашган Араб Амирликлари(БАА)да ишлаётган қирғизистонлик Чинара Жантошева коронавирусга қарши курашга қўшган ҳиссаси учун Дубай амири Мақтум ибн Рашид Ал Мақтум томонидан “олтин виза” билан тақдирланди. Визанинг бу категорияси БААда 10 йил муддат давомида ишлаш имкониятини беради.
Чинара Жантошеванинг мутахассислиги анестезиолог-реаниматолог бўлиб, ўлим ва ҳаёт ўртасида курашаётган беморлар билан бевосита ишлайди. Унинг тан олиб айтишича, 11 йилдан бери ишлаб келаётган давлатга тегишли Rashid Hospital шифохонасининг реанимация ва интенсив терапия бўлимига ҳеч қачон бир вақтнинг ўзида бугунги кундек кўплаб беморлар келган эмас.
«Ўзимнинг бутун амалиётим давомида ўлим билан боғлиқ бу каби ҳолатга тўқнаш келмаган эдим. Тўғри оммавий равишда юқумли касалликлар қайд қилинган, шифохонага кўплаб беморлар ётқизилган. Аммо касалликнинг бу қадар тез тарқалишини мен илк бор кўриб турибман», – дейди Чинара.
2019 йилда БААда хорижлик инвесторлар ва алоҳида олинган категориядаги мутахассисларга мамлакатда беш ва ўн йил муддат давомида яшаш ва ишлаш ҳуқуқини берувчи “олтин виза” берила бошланди. Бу каби категориядаги илк визани 45 йилдан бери БААда яшаб келаётган таниқли ҳиндистоннлик бизнесмен Юсуф Али олди. The National нашрининг маълумотига кўра, унинг капитали тахминан 4,7 млрд долларни ташкил қилади.
Чинара Жантошеванинг айтишича, шу каби нуфузли инсонларга бериладиган визани олиш ҳақида мутлақо ўйлаб ҳам кўрмаган экан. Шу сабабли у бу янгилик борасида маълумот берган мэриядан бўлган телефон қўнғироғида айтилган хабарга ишонмаган.
«Менга, шайх Муҳаммаддан “олтин виза” олишингиз учун «сизнинг паспорт маълумотларингиз керак” дейишганида гапимни йўқотиб қўйдим. Кейинроқ, ҳужжатларимни олиб бордим. Орадан кўп ўтмай мен 10 йил муддатга виза олдим «, – дейди Чинара.
Умумий ҳисобда БАА расмийлари 212 нафар хорижлик тиббиёт ходимларининг хизматларини шу тариқа тақдирлади. Турли маълумотларга кўра БААда 3 мингдан 5 мингтача қирғизистонлик истиқомат қилади.
